கால்கள்

மழைக்கால நடைபாதைகளில்
கவனியாது விரையும்
மாபலிக் கால்களினூடே
கூன்சுமந்து ஊரும்
நத்தைகளை
பதைபதைத்து நோக்குகிறேன்

அறியாது அவை
மாபலிக்கும்
காத்திருக்கும்
பிறிதொரு வாமனக் கால்கள் 

திணை மயக்கம்

நாட்காட்டியில் தாள்கள் கிழியும் சத்தம்

நொடிகள் கழியும் சத்தம்

யன்னலின் வெளியே

நிறம் மாறி மாறித் தோன்றும்

இரவின் வெக்கையும்

பகலின் மழைஈரமும்

வாழ்வு என்பதும்

நகர்தல் என்பதும்

அர்த்தமற்ற ஒலிக்குறிப்புகள்

சருகாகவும் தளிராகவும்

மிக மென்மையாக

மிக மிக அமைதியாக

உதிர்த்துக் கொண்டிருக்கிறது

காலம்

திறந்தே கிடந்தும்

யாரும் நுழையா

இக்கதவுகள்

திங்களொரு முறை

தோன்றும் மகனோ மகளோ

வருவது கூட

அசையா கதவுகளின்

மன்றாடலின் பேரில்

அசையா நாற்காலி அஃறிணை

அசையா கட்டில் அஃறிணை

அவற்றினூடே

உயிர்ப்புடனொரு

நாட்காட்டியும் கடிகாரமும்

பதாகை  மின்னிதழில் வெளிவந்திருக்கும் கவிதை: திணை மயக்கம்

http://padhaakai.com/2015/12/09/exotica/